Qo`llar uzoq vaqt mayinlik va elastikligini yo`qotmasligining faqat bir usuli mavjuddir, u ham bo`lsa doimiy parvarish.

Vizit qog`ozi

Aynan qo`llar odamning, ayniqsa ayolning haqiqiy yoshidan darak beradi. Hayron bo’lishga o`rin yo`q. Ahir boshqa qaysi bir a’zo qo’l kabi  ko`p ish bajaradi? Qo`llarimizga eng ko`p zarar beradigan narsa ximik vositalar bo`lib, ulardan idish, oyna, kir-chir yuvishda ko`plab foydalanamiz. Bundan tashqari hovlida yashaydiganlar yoki tomorqasi borlarning qo’llari dehqonchilik oqibatida ham ozmi-ko`pmi zarar ko`radi. Hatto ta’til ham bekor o`tmaydi. Dam oldingiz, cho’milib, tennis, ping-pong o’ynadingiz. Turli trenajyorlarda mashqlar bajardingiz… Hullas, mazza qildingiz, ancha yoshardingiz ham, lekin qo’llaringizga qarang: ular ancha qaribdi, terisi o`ta quruq, dag`al, pigment dog`lar paydo bo`libdi, kaft terisi esa qalinlashib, qadoq bog`labdi. Bu qadoqlar sport bilan shug`ullanish oqibatida paydo bo`lgan bo`lsa ham ko`cha-kuyda uchragan har kimga bu haqida gapirib yurmaysizki endi?! Aytilganlar siz haqingizdami? Unda bor sabringizni yig`ib ishga kirishing. Qo`llaringizning salomatligi va chiroyi o`z qo`lingizda!