Nazm
Agar o’z elating qadr etsa seni,
“O’g’lim” desa sevib, boshingni silab.
Uying mo’risidan chiqsa tutuni,
Hovlingda bolalar chopsa do’mbillab –
Bu sening baxtingdir, beqiyos baxting.
Otang qo’lin ochsa duoga mudom,
Munis onang yopsa issiqqina non,
Ta’zim etsa kelin, ul qutlug’ qadam,
Qaynab tursa tinmay ro’zg’orda qozon,
Bu sening baxtingdir, beqiyos baxting.
Chin duosin mustajobin bergin Alloh,
Sening bilan nurli suhbat qurdi begim.
Bandalaring qatorida Rabbim deya,
Joynamozdan umid bilan turdi begim.
Jamoatda jam bo’lar pok mo’min ahdi,
Jamoatdan qo’rqib sinar shayton shahdi
Har yurakning sof niyati Tangri taxti
Joynamozdan umid bilan turdi begim.
O’zi berdi sizga umr gultojini,
Ahli ayol, farzand nomlig’ ishonchini,
Shukronada so’rang begim, tilang begim,
Alloh bersin ishlaringiz rivojini...
Davlat berar riyozatin chekkan qulga,
Davlat berar umidla don ekkan qulga,
Sinab bergan siylab berar qadoq qo’lga,
Alloh bersin ishlaringiz rivojini...
("Jiyda gulim"ni tinglab...)
Ona, desam, yig’lar bo’lsa armonlar ham,
Ona, desam, ifor to’ksa rayhonlar ham,
Dardim sig’mas bu dunyoga, ko’zimda nam,
Onajonim, kim oladi dardlarimni?
Yuragiga yetmay qolib toatlarim,
Sevar yor ham tinglamasa hasratlarim,
Yuzni qaro qilib ketsa ulfatlarim,
Onajonim, kim oladi dardlarimni?
Bir do’konning qarshisida uch-to’rt xotin,
Gurunglashib kutar arzon yog’ navbatin.
O’sha yerdan o’tib qoldi bitta erkak,
Huddi shundan boshlanadi bizning ertak.
O’tirsangiz rohat qilib, siz issiq uyda
Xotiningiz non dardida qay ko’cha-ko’yda?
Erkaklar-chun or emasmi ayol xor bo’lsa?!
Alpomishu Go’ro’g’lilar endi ertakmi?
“Erkak” degan nom kimlarga endi ermakmi?
Xotiniga qarab qolgan erkak erkakmi?
Erkaklar-chun or emasmi ayol xor bo’lsa?!
Page 1 of 2
