Бир қарашда бахти тўкис оиланинг бекасисиз. Турмуш ўртоғингиз, бир-биридан ақлли, одобли фарзандларингиз, сизни тилидан бол томиб мақтайдиган қайнонангиз, иш, оила ва фарзандларига бирдек улгурадиган уддабурон аёл — сизга барчанинг ҳаваси келади. Бироқ ҳаммма ўзидан ўтганини ўзи билади-да... Яхшиямки ётоқхонанинг эшиги, тилни тўсиб турувчи тишлар бор. Акс ҳолда, жуфтингиз билан ўртангиздаги сўна бошлаган муҳаббат олови асл бахтингизга соя ташлаётганини бошқалар ҳам билган бўлишармиди?! Қаерда хато қилдим деб ўйлашингиздан фойда йўқ, яхшиси, вазиятни тузатиш йўлларини ахтаринг. Олий тоифали шифокор, руҳшунос Алишер ТЎРАЕВ бу борада сизга ўз маслаҳатларини бериб ўтади.
1. Рўзғорга ўралашиб қолманг!
Уй тозалаш, кир ювиш, дазмоллаш, пол ва чанг артиш, идиш-товоқлар-у бозор – ўчар таги кўринмас ғорнинг ишлар ҳеч қачон тугамайди, кам – кўсти ёпилмайди. Шундай экан, улар учун асосий куч ва эътиборингизни сарфлашингиз тўғрими? Ҳар куни артадиган ўша полингиз сизга меҳр берармиди? Ёки бугун эмас, эратага дазмол қилинадиган кийимларингиз эрингиз билан муносабатларингизни тузатадими? Тозалик ва озодалик муҳим, буни инкор этолмаймиз. Эркак хонанинг чанги артилганига 2 кун бўлганини билмаслиги мумкин, лекин сизнинг эътиборингиз камайганини дарҳол сезади.
2. Телевизор ва телефондан узоқроқ бўлинг!
Сериал, телефон ёки компьютер ўйинларини бироз четга суриб қўйинг. Уларга вақтингиз сероб-у, жуфтингиз учун йўқми?! Турмуш ўртоғингиз билан ўртангизда ғов бўлаётган барча нарсаларни енгиб ўтинг. Агар турмуш ўртоғингиз сиз каби осонгина телефонидаги ўйинидан воз кечолмаса, ўша ўйинни у билан бирга ўйнаш орқали умумий мавзу топишингиз мумкин. Вақтни оқар сувга тенглаштирамиз-у, лекин ундан тўғри фойдаланишни билмаслигимиз ачинарли. Тунни телефонни қўлга олиб эмас, бир-бирингизни қучоғингизда ўтказинг!
3. Иш ва чарчоқ...
Иш билан оилани бир-бирига аралаштирманг. Ишхонада асабийлашган бўлсангиз ёки чарчоқдан йиқилиб тушай деб турсангиз ҳам жуфти ҳалолингизга икки оғиз ширин сўз айтишга ўзингизда куч топинг. Чарчоқни енгиш учун эса контраст душ ёки эфир мойлари қўшилган ванна қабул қилинг. Балки турмуш ўртоғингизни ҳам чақирарсиз...
4. Ўзингизга ишонинг!
Унутманг: у сизга уйланган! Сиз фарзандларининг онаси, қўрғонининг бекасисиз! Демак, ҳаётидаги энг муҳим аҳамиятга эга аёл ҳам сиз бўласиз! У фақатгина сизни дейди, бунга ишонинг. Атрфодаги шунча қизлар орасидан у сизни ягонаси деб билган. Эркак киши бир сўзли бўлади, сиз унинг танловисиз! Бунинг учун эрингизни ҳам, ўзингизни ҳам ҳурмат қилинг. Камчиликларимни билмайди деб ўйламанг, эрингиз сизни улар билан бирга севади. Сиз ўзингизни борингизча қабул қилинг, тамом. Бор гўзаллигингиз ва жозибангизни ишга солинг! Эрингизни қайтадан ром этинг...
5. Янгиликлардан чўчиманг!
Жуфтингиз сизга ётоқхонада бирор бир янгиликни синаб кўриш таклифи билан чиқса, рад этишга шошилманг. Биринчидан, бу ишларни қилишга рози бўладиган бошқа биров топилиб қолиши мумкин. Иккинчидан, бир хилликдан ўзингиз ҳам зерикмадингизми? Айнан янгиликлар сизга янги туйғулар эшигини очиши мумкин.
Манба: Darakchi.uz
