Тўйимдан аввал гўзаллик салонида киприк улатгандим.Натижадан кўнглим тўлди, бироқ икки ой ўтганидан кейин сунъий киприкларим тўкилиб туша бошлади. Улар яккам-дуккам кўринишга кела бошлагач, олиб ташлашимга тўғри келди. Бироқ энди бошқа муаммо қийнаяпти, ўзимнинг киприкларим аввалгидан ҳам заиф ва сийрак бўлиб қолган. Уларни ҳеч бўлмаганда дастлабки ҳолига қайтаришни истайман. Бунинг учун нима қилсам бўлади?
Баҳора, Самарқанд вилояти
1. Тўғри олиб ташлаш керак
Одатда ёпиштирилган киприклар тўғри олиб ташланса, табиий киприкларга зиён етмайди. Бироқ кўпгина аёллар ортиқча харажатдан қочибми ёки вақтларини қизғонибми, сунъий киприкларни уй шароитида олиб ташлашга уринадилар. Натижада уларга зиён етгани қолади, холос. Киприклар юлиниб, синиб, кўркамлигини йўқотади. Гўзаллик салонида эса мутахассис елимни эритувчи махсус воситадан фойдаланади ва табиий киприкларингизга зиён етмайди.
2. Синалга усулдан фойдаланамиз
Сизнинг ҳам хаёлингизга канакунжут мойидан фойдаланиш келдими? Яшанг, тўғри фиркрлаяпсиз. Киприкларни қалинлаштиришда бу мойга тенг келадиган йўқ. Хўш, уни қандай ишлатган афзал? Агар ухлаш олдидан пахтали дискларни мойлаб, кўз устига қўйсангиз, эрталаб қовоқларингиз шишиб кетиши мумкин. Бунинг олдини олиш учун бўшаган тушингизнинг идишини яхшилаб тозалаб, ичига какнакунжут ва чаканда мойларини тенг миқдорда аралаштириб, оддий шприц ёрдамида солиб қўйишни тавсия этамиз. Демак, аралашмани киприкнинг ўзигагина суртсангиз, кўз атрофидаги нозик терида шишлар пайдо бўлмайди. 15-20 дақиқадан кеийн ортиқча ёғни қоғоз сочиқчалар ёрдамида артиб оласиз. Аралашмани музлаткичда сақлаш ёдингиздан кўтарилмасин. Шунингдек, бошқа ёғларни ҳам қўллаб кўрсангиз бўлади. Масалан, бодом мойи киприк тўкилишининг олдини олиб, ўсишини тезлаштиради. Атиргул мойи эса қовоқларнинг нозик терисига ижобий таъсир кўрсатиб, ажинларга қарши ажойиб профилактикадир.
3. Ўсма қўйишга эринманг!
Момоларимиз неча асрлардан бери қўллаб келаётган ўсма қош ва киприклар учун тенги йўқ восита эканини ҳаммамиз биламиз. Унда нимага унда ўсмани қўйиб, бошқа усулларни қўллаб, ўзимизни қийнашимиз керак? Бугуннинг ўзидаёқ қошларингиз ва кипригингизни озиқлантиришни бошланг. Улар албатта сиздан миннатдор бўлишади.
4. Табиий усулда бўяймиз
Агар киприкларингизни қора рангга бўяшни истасангиз, сунъий бўёққа мурожаат қилиб ўтирманг. Бунинг табиий ва синалган усули мавжуд. Демак, бир чой қошиқ канакунжут мойига худди шунча миқдорда аччиқ қилиб дамланган қора чойдан аралаштириб, киприкларга суртасиз-да, 20 дақиқадан сўнг қоғоз сочиқча билан артасиз. Амалиётни ҳафтада икки марта бажариб турсангиз, киприкларингиз қора тусга кира бошлайди.
5. Зардоб ва дорилар вақтинчалик чора
Муаммонинг чорасини интернет тармоғидан излашга қарор қилган бўлсангиз, биринчи навбатда, сизники сингари муаммога дуч келган аёлларни кўплаб учратишингиз мумкин. Шунингдек ўзларининг гўзаллик борасидаги маслаҳатларини аямайдиган блоггерлар ҳам бу борада ўзига хос фикрларни айтиб ўтишади. Улар орасида қимматбаҳо зардоблар ва кўз босимини тушуриш учун мўлжалланган дорилардан фойдаланишни тавсия қиладиганлар ҳам учрайди. Зинҳор-базинҳор уларнинг тавсияларига амал қила кўрманг. Биринчидан, бундай воситаларнинг натижаси узоқ муддатли эмас. Фойдаланишдан тўхтасангиз, бир ой ўтиб, мўъжиза тугайди. Иккинчидан, уларнинг таркибида гормонлар мавжуд бўлиб, дори воситалари хасталикни даволашга мўлжалланган. Мунтазам қўлланганда қарши таъсир кўрсатиш эҳтимоли мавжуд. Бироқ шифокор билан маслаҳатлашган ҳолда В гуруҳи витаминларини қабул қилсангиз бўлади.
6. Борини чиройли кўрсатамиз
Киприкларни аввалги ҳолига келтиргандан сўнг эса албатта, тушдан фойдалана бошлаймиз. Бунда тушнинг сифати билан бирга чёткасининг турига ҳам алоҳида эътибор қаратинг. Масалан, силикондан тайёрланган чёткалар калта ва қалин киприкларга мос келади. Іаммамиз биладиган тукли чёткалар эса узун киприкларга мўлжалланган. Чунки бундай чёткада кўп миқдорда туш чиқади ва калта киприкларни бир-бирига ёпиштириб қўяди. Тушнинг қай тури айнан сизнинг киприкларингизга мос келишини эса фақат синаб кўрибгина аниқлайсиз. Шунингдек, дунё гўзаллари бир марта туш суртгандан кейин киприкка упа суртиб, устидан яна бир бор тушь билан бўяшар экан. Бу усул ҳам киприкларни узунроқ кўрсатади.
Манба: Darakchi.uz
