Bugungi kunda oziq-ovqat do‘konlaridan o‘zingiz istagan turdagi pecheneni topish muammo emas. Bunday imkoniyat uyda pishiriq tayyorlash uchun hojat ham qoldirmasligi mumkin. Biroq masalliqlar sifatiga ishonchingiz komil bo‘lishi, shuningdek, farzandlaringiz sizni “mohir pazanda” deb bilishi uchun vaqti-vaqti bilan uyda pechene pishirib turish zarar qilmaydi :) Bu jarayonga bolalaringizning o‘zlarini ham jalb etishingiz mumkin.
Zarur masalliqlar:
- 100 g margarin
- 2 ta tuxum
- 0,5 stakan shakar
- 2 osh qoshiq asal
- 0,5 choy qoshiq osh sodasi
- 200 g un
Tayyorlanishi:
2 osh qoshiq asalni idishga solib, gaz plitasida eritamiz. U erib, qaynay boshlaganida 0,5 choy qoshiq osh sodasini solib, aralashtiramiz. Shunda asal ko‘pirib ketishi kerak. So‘ng uni darhol olovdan olamiz.
Xona haroratida erigan 100 g margarinni 2 ta tuxum va 0,5 stakan shakar bilan yaxshilab aralashtiramiz. Ustiga sovigan asalni ham solib, yana aralashtiramiz.
Aralashmaga unni asta-sekinlik bilan qo‘shamiz.
Qo‘lga yopishmaydigan mayin xamir qoramiz.
Xamir yoyiladigan yuzaga un sepib, xamirni taxminan 0,5 sm qalinlikda yoyamiz. So‘ng maxsus qolipchalar yordamida shakllar kesib olamiz.
Ularni listga terib chiqib, 175 darajagacha qizdirilgan duxovkada 15—20 daqiqa davomida pishiramiz.
Pechenelarning usti och jigarrang tusga kirganida duxovkadan olamiz.
Asalli pechene tayyor. Yoqimli ishtaha!
