Chipslarni yoqtirmaydigan kishining o‘zi bo‘lmasa kerak. Chipslarni eng kam miqdordagi yog‘ bilan mikroto‘lqinli pechda ham tayyorlash mumkin.

Zarur masalliqlar:

• Kartoshka
• Ta’bga ko‘ra tuz, garmdori va achchiq qalampir
• O‘simlik yog‘i

Mahsulotlarning taxminiy narxi 2000 so‘m.

Tayyorlanishi:

Bir kosa tayyor chipslar uchun o‘rtacha 5—6 ta kartoshka ketadi.

1. Kartoshkalarni tozalab, yupqa qilib (1—2 mm qalinlikda) to‘g‘raymiz. Kesishda sabzavot archish uchun qo‘llaniladigan asbobdan ham foydalanish mumkin.

2. So‘ng, ortiqcha kraxmaldan xalos qilish uchun to‘g‘ralgan kartoshkalarni sovuq suvda chayamiz.

3. Ta’bga qarab tuz va qalampir qo‘shamiz. Kartoshka ustiga yog‘ sochib chiqamiz va qog‘oz to‘shalgan mikroto‘lqinli pech likopiga terib chiqamiz.

Uni pechga qo‘yib, eng yuqori quvvatda 3 daqiqa davomida pishiramiz. Agarda chipslaringiz qalinroq bo‘lsa, vaqtni yana bir daqiqaga uzaytirish mumkin.

Tayyor chipslarni sovitamiz va shundan keyin idishga olamiz.

Uy chipslari tayyor. Yoqimli ishtaha!

Manba: Daryo.uz