Zarur masalliqlar:

Xamiri uchun:

• 2 stakan un
• 2 osh qoshiq shakar
• 120 ml o‘simlik yog‘i
• 6 osh qoshiq sovuq suv
• bir chimdim tuz

Qiymasi uchun:

• 2—3 dona olma
• 100 g shakar
• 2—3 osh qoshiq un

Tayyorlanishi:

Idishga un, shakar, tuz solib, o‘simlik yog‘i va sovuq suv quyamiz.

Barchasini aralashtirib, xamir qoramiz. Uni biri kattaroq, biri kichikroq ikki bo‘lakka bo‘lamiz va sovitgichga taxminan 1 soatga qoldiramiz.

Forma tubiga xamirning kattaroq bo‘lagini qo‘yib, bir tekis qilib yoyib chiqamiz, chetlarini biroz tepaga chiqaramiz.

Endi qiymasini tayyorlaymiz. Buning uchun olmalarni yuvib, artib, po‘stidan tozalab, maydaroq qilib to‘g‘raymiz. Unga un va shakarni qo‘shib, aralashtiramiz.

Aralashmani formaga solamiz, ustini xamirning kichik bo‘lagi bilan yopamiz.

Xamirlarning chetlarini birlashtirib chiqamiz, o‘rtasidan bug‘ chiqib ketishi uchun teshikcha ochamiz.

Pirog ustiga o‘simlik yog‘ini surib, shakar sepamiz.

Pirogni 180 darajagacha qizdirilgan duxovkada 50—60 daqiqa davomida pishiramiz.

Olmali pirog tayyor. Yoqimli ishtaha!