Tagiga olmaydigan qoplamali (sirli) idishlarda mavjud moddalar inson organizmiga tushganda saraton kasalligini keltirib chiqarishi mumkin. Daily Mail Vashington atrof-muhit muhofazasi agentligi ma’ruzasiga asoslanib, shu haqida xabar berdi, deb yozadi Kun.uz.

Tadqiqot ma’lumotlariga ko‘ra, siri ko‘chgan tova yoki kastryuldan foydalanilsa, perftoroktan kislota inson organizmiga salbiy ta’sir qilishi mumkin. Bu modda shuningdek suvga va o‘tga chidamli materiallar tarkibiga ham kiradi.

Ta’kidlanishicha, perftoroktan kislota zarrachalari toksik xususiyatlarga ega. Ularning inson organizmiga tushishi saraton rivojlanishi, xolesterin miqdorining oshishi va immun tizimi funksiyasining pasayishiga olib kelishi mumkin.

Laboratoriya hayvonlari ustida o‘tkazilgan tadqiqotlar ushbu moddaning jigar, oshqozon osti bezi va jinsiy a’zolar saratoniga olib kelishini ko‘rsatdi. Bundan tashqari, perftoroktan kislota bepushtlikni keltirib chiqarishi mumkin.