Bir necha oylar avval ham shunday bo‘lgandi, ertalab uyqudan uyg‘onsam, o‘ng ko‘zimning ichi qizarib ketgan. Shifokorga uchrashsam, kampillyar tomir yorilishi deya tashxis qo‘ydi. Tomchi dorilarni qo‘lladim, bir muddat quyoshdan himoyalovchi ko‘zoynakdan foydalandim. Ikki kun avval yana o‘ng ko‘zim ichi qizara boshladi. Kapillyar qon tomir yorilishining sababi nima? Balki bu biror kasallik alomatidir? Shu haqida bilmoqchi edim.

Shahnoza Boltoboyeva, Toshkent shahri

Savolga shifokor okulist Nodira RASULOVA javob beradi:

– Arterial qon bosimi maksimal darajada ko‘tarilgan paytlarda yoki doimiy ravishda qon bosimi yuqori yuruvchi kishilarda yuqori bosim ko‘zdagi mayda kapillyarlarning zararlanishi ya’ni yorilib, ko‘zda qizarish alomatining kelib chiqishiga sabab bo‘ladi. Bunday hollarda ba’zan burun qonashi ham kuzatilishi mumkin. Sizga maslahatim, okulist, kardiolog va terapevt shifokorlar ko‘rigidan o‘ting. Muammo nimada ekanligini aniqlash uchun arterial qon bosimini o‘lchash, yurak EKG si hamda qon va peshob suyuqligining umumiy tahlilini o‘tkazish lozim. Shu bilan birga ko‘z ichki bosimini o‘lchash ham talab etiladi. Ko‘z to‘r pardasi (tomir va nervlar holatini chuqur o‘rganish) holatini ham kuzatish lozim. Kapillyarlarning yorilib, ko‘z konyuktivasiga qon quyilishi ko‘zdagi, qizarish qon bosimi ko‘tarilganida (xafaqon kasalligi) yoi ko‘z ichki bosimining ortishi (glaukoma) da ham sodir bo‘ladi. Tibbiy tekshiruvlarga qo‘shimcha ravishda nevrapolog ko‘rigini ham tavsiya etgan bo‘lar edim.

Manba: Darakchi.uz