Bu niqoblarni yuzingizga haftada ikki marta surtib, 15-20 daqiqadan keyin yuvib tashlang. Natijasini ko‘rib, tan berishingiz aniq!

Quruq va normal yuz terisi uchun olmali oziqlantiruvchi niqob:

1 osh qoshiq saryog‘ni olma va tuxum sarig‘ining qirindisi bilan qo‘shamiz. Unga 1 choyqoshiq asal solib aralashtiramiz. Bu niqobni yuzga surtib 20 daqiqadan keyin iliq suv bilan yuvib tashlash kerak.

Quruq va normal yuz terisi uchun tozalovchi va oziqlantiruvchi karamli niqob:

Karamni go‘shtmaydalagichdan o‘tkazib, tayyor bo‘lgan bo‘tqani yuzga surtib, 20 daqiqadan keyin uy haroratidagi suv bilan yuvib tashlang.

Aralash tipdagi yuzlar uchun bananli oziqlantiruvchi niqob

Bananni bo‘tqa qilib, unga 2 oshqoshiq qaymoq(slivki), 1 oshqoshiq asal solib, mikser bilan ko‘pirtiramiz. Tayyor bo‘lgan kremni darrov yuz, bo‘yin, dekolte sohasiga surtib, 20-30 daqiqa qoldiramiz. Niqobni kosmetik salfetka bilan tozalaymiz.

Quruq yuzlar uchun sabzili niqob

Qirg‘ichning mayda tishidan ikkita qizil sabzini o‘tkazing. Tayyor bo‘lgan sabzi bo‘tqasiga 1 dona tuxum sarig‘i va 1 choyqoshiq o‘simlik (yaxshisi zaytun) yog‘ini qo‘shing.

Normal va quruq yuz terisi uchun kartoshkali niqob

2 dona xom kartoshkani qirg‘ichdan mayda qilib o‘tkazib, unga 1 ta tuxum sarig‘i va 1 oshqoshiq sut qo‘shing. Ko‘zga hunuk ko‘rinsa-da, bu niqob ajoyib natijalar beradi. U nafaqat yuzning qurishi va teri ko‘chishidan, balki shishishdan ham asraydi.

Yog‘li yuz terisi uchun qatiqli niqob

Ikki oshqoshiq qatiqni 1 oshqoshiq kofe maydalagichda tuyilgan suli yormasi (gerkules) bilan aralashtiramiz. Xohishga ko‘ra qatiq o‘rniga kefir yoki atsidofilin ishlatsa ham bo‘laveradi.

Manba: Darakchi.uz