Ekler tayyorlaymiz

Xamiri qaynoq suvda qorilib, ichi mazali krem bilan to‘ldiriladigan ushbu pishiriq oilangizning barcha a’zolariga birdek ma’qul kelishiga shubhamiz yo‘q. Shirinlikka o‘zingiz istagan shaklni berishingiz va ta’bingizga mos krem bilan to‘ldirishingiz mumkin.

Zarur masalliqlar:

xamiriga:

1 stakan suv
1 stakan un
100 g margarin
1 chimdim tuz
4—5 ta tuxum

kremiga:

1 banka quyultirilgan sut (qaynatilgani)
100 g margarin

Tayyorlanishi:

Idishga, suv, margarin va tuzni solib, olovga qo‘yamiz.

Margarin erib, suv qaynab chiqqach, olovdan olamiz va un qo‘shamiz.

O‘rtacha olovda aralashtiramiz. Xamir quyuq holga kelgach, idishni olovdan olib, 5—10 daqiqa sovitamiz.

So‘ng tuxumlarni bittadan solib, qoshiq bilan yoki mikser yordamida yaxshilab aralashtiramiz.

Hamma tuxumlar birma-bir solingach, xamir suyuqroq ko‘rinishga keladi.

Listga biroz suv purkab, ustidan qog‘oz to‘shaymiz. Ustiga xamirni qoshiq yoki uchi teshik maxsus xaltacha yordamida o‘zimizga yoqqan shaklda qo‘yib chiqamiz.

Eklerlarni dastlab 210 darajagacha qizdirilgan duxovkada 15 daqiqa davomida pishiramiz, so‘ng haroratni 16 darajagacha tushirib, yana 15 daqiqaga qoldiramiz. Oxirida duxovkani umuman o‘chirib qo‘yib, yana 10—15 daqiqa kutamiz.

Ungacha kremni tayyorlab olamiz. Buning uchun 1 banka qaynatilgan quyultirilgan sutni xona haroratida yumshab turgan 100 g margarin bilan mikser yordamida aralashtiramiz.

Tayyor eklerni olib, yonidan cho‘p yordamida teshamiz va ichiga krem solamiz. Bunda shprits yoki maxsus qandolatchilik qopchasidan foydalanish mumkin.