Хамири қайноқ сувда қорилиб, ичи мазали крем билан тўлдириладиган ушбу пишириқ оилангизнинг барча аъзоларига бирдек маъқул келишига шубҳамиз йўқ. Ширинликка ўзингиз истаган шаклни беришингиз ва таъбингизга мос крем билан тўлдиришингиз мумкин.
Зарур масаллиқлар:
хамирига:
- 1 стакан сув
- 1 стакан ун
- 100 г маргарин
- 1 чимдим туз
- 4—5 та тухум
кремига:
- 1 банка қуюлтирилган сут (қайнатилгани)
- 100 г маргарин
Тайёрланиши:
Идишга, сув, маргарин ва тузни солиб, оловга қўямиз.
Маргарин эриб, сув қайнаб чиққач, оловдан оламиз ва ун қўшамиз.
Ўртача оловда аралаштирамиз. Хамир қуюқ ҳолга келгач, идишни оловдан олиб, 5—10 дақиқа совитамиз.
Сўнг тухумларни биттадан солиб, қошиқ билан ёки миксер ёрдамида яхшилаб аралаштирамиз.
Ҳамма тухумлар бирма-бир солингач, хамир суюқроқ кўринишга келади.
Листга бироз сув пуркаб, устидан қоғоз тўшаймиз. Устига хамирни қошиқ ёки учи тешик махсус халтача ёрдамида ўзимизга ёққан шаклда қўйиб чиқамиз.
Эклерларни дастлаб 210 даражагача қиздирилган духовкада 15 дақиқа давомида пиширамиз, сўнг ҳароратни 16 даражагача тушириб, яна 15 дақиқага қолдирамиз. Охирида духовкани умуман ўчириб қўйиб, яна 10—15 дақиқа кутамиз.
Унгача кремни тайёрлаб оламиз. Бунинг учун 1 банка қайнатилган қуюлтирилган сутни хона ҳароратида юмшаб турган 100 г маргарин билан миксер ёрдамида аралаштирамиз.
Тайёр эклерни олиб, ёнидан чўп ёрдамида тешамиз ва ичига крем соламиз. Бунда шпритс ёки махсус қандолатчилик қопчасидан фойдаланиш мумкин.
Эклер тайёр. Ёқимли иштаҳа!
