Kartoshkani “ikkinchi non” deyishadi. Bu sabzavotning ko‘pgina kasalliklarga shifo ekanini eshitib kelardim. Yaqinda bir dugonam bosh og‘rig‘i, buyrak og‘rig‘ida kartoshkadan foydalanish haqida so‘zlab berdi. Ularni sizlar bilan ham o‘rtoqlashmoqchiman.

● Tez-tez bosh og‘rig‘i bezovta qilganda, bir dona xom kartoshka archilib, qirg‘ichdan chiqariladi. So‘ng 2 stakan qaynatilgan suvga solinib, 4-5 daqiqa qaynatiladi. Qaynab chiqqach, doka yordamida suzib olinadi va shu suvdan har nonushta oldidan yarim stakandan ichiladi. Muolaja har 3 kunda bir marta bir oy mobaynida bajariladi.

● Buyrak shamollaganda yoki buyrakda tosh yi­g‘il­gan­da ham darmon o‘rnida kartoshka asqatadi. Buning uchun o‘rtacha kattalikdagi 5-6 dona kartoshka po‘stlog‘i bilan suvda qaynatiladi. Ezilib pishgach, po‘stlog‘i bilan yaxshilab mijig‘lanadi va bo‘tqa holatiga keltiriladi. Tayyor bo‘tqaga 1 osh qoshiq ichimlik sodasi solib, yana aralashtiriladi. Hosil bo‘lgan malhamni og‘riyotgan buyrak ustiga yoyish kerak. Ustidan sellofan va sochiq o‘raladi.

40 daqiqadan so‘ng kartoshkali malhamni asta-sekin olib, terini iliq suvda chayish lozim. Bu muolajani 2-3 marta takrorlang. Muolajadan so‘ng qorin sohasini doim issiq tutishni unutmang.

● Kuyishdan jarohat olganda ham kartoshka bilan birinchi yordam ko‘rsatish mumkin. Agar tananing biror joyi kuyib qolganda, ochiq yara hosil bo‘lmagan bo‘lsa, tezda 1 dona kartoshkani po‘stlog‘idan archib, qirg‘ichdan chiqaring. So‘ng terining kuygan qismiga qo‘yib, mato bilan o‘rang. Kartoshka ilib qolgach, uni boshqasiga almashtiring. Shu tariqa bir necha marta tak­rorlang. Natijada og‘riq va achishishlar ketib, kuygan teri asta-sekin tuzala boshlaydi.

Shahlo Rustamova, Qarshi shahri

Manba: Darakchi.uz