Bugun, 3-avgust — Xalqaro tarvuz kuni. Shu munosabat bilan tarvuzdan tayyorlanuvchi muzqaymoq retsepti bilan bo‘lishishga qaror qildik.
Tarvuz meva emas, balki bodringdoshlar oilasiga kiruvchi sabzavotdir. Bundan 5 000 yil avval Qadimgi Misrda yetishtirilgan. Tarvuz 90 foiz suv, 10 foiz fruktozalardan tashkil topgan. Unda A, B6 va S vitaminlari hamda boshqa mikroyelementlar bor. Shu bois, ko‘pgina kasalliklarga davo ekanligi tibbiyotda tasdiqlangan.
Aynan tarvuz po‘stlog‘ida tortiladigan desert yozning issiq kunlarida salqinlik, ajoyib ta’m baxsh etadi.
Zarur masalliqlar:
- 1 dona tarvuz
- 1 stakan shakar
- 1 stakan suv
Tayyorlanishi:
1. Tarvuz yuviladi, o‘rtasidan ikki bo‘lakka kesiladi va lahm joyi qirib olinadi.
2. Urug‘laridan tozalanib, lahm joyi blenderda (maydalagich) ko‘pirtiriladi. Suv bilan shakar upasi qiyom holiga kelguncha qaynatiladi.
3. Tayyor bo‘lgan tarvuz sharbati va qiyom aralashtiriladi. Muzlatgichga 2-3 soatga yoki bir kechaga qo‘yiladi. Uni muzlatgichdan olib, maxsus asbob bilan yoki blenderda ko‘pirtiramiz. Aralashmaga shokolod burdalarini ham solish mumkin. Ular tarvuz danaklari ko‘rinishini hosil qiladi.
4. Tayyor muzqaymoq tarvuz po‘stlog‘iga joylashtiriladi va 3—4 soatga yana muzlatgichga qo‘yiladi.
5. Iliq suvga namlangan pichoq bilan tarvuz bo‘laklari kabi kesiladi va darhol dasturxonga tortiladi.
Yoqimli ishtaha!
