Туш – инсон кўрган-кечирганларининг айқай-уйқаш кўринишидир. Инсон тушида кўрганларидан ҳам кўра, ҳис қилганларининг, унинг руҳиятида кечаётган ҳолатнинг ўрни юқори.

Ривожланган дунёда инсонлар ғалати тушларининг таъбирини руҳшунослар ёрдамида аниқлашга ҳаракат қиладилар. Руҳшунос Ян Уоллен ҳам 30 йиллик фаолияти давомида 150 минг хил сюжетга эга турли-туман тушларга изоҳ излашга ҳаракат қилган.

У мижозлари томонидан энг кўп айтиладиган тушларнинг 10 тасини айтиб, изоҳлаб, уларни келтириб чиқарган ташқи омилларга нисбатан кўриш керак бўлган чоралар билан ўртоқлашди.

10. Тушда ит талаши ёки тишлаши

Ҳаётда ит инсоннинг дўсти бўлса ҳам, унинг кимнингдир тушига кириши кўпинча хосиятсиз ҳисобланади. Боиси тушга кирган ит аксарият ҳолда инсонга ҳужум қилади.

Инсоннинг ҳаётда кимлар биландир муроса қила олмаслиги тушида итга ёки бошқа ҳайвонларнинг унга ҳужум қилишига сабабчи бўлади. Тушда бундай ҳайвонларнинг қўлни тишлаши, талаши ва ташланиши носоғлом меҳнат шароитини англатади. Яъни, бу – мунтазам фисқу фасод, ғийбат ва ҳасад авж олган иш муҳити бўлиши мумкин.

Шу билан бирга, ким биландир душманга айланиб қолган инсоннинг бундан руҳий изтиробга тушиши, у инсоннинг ҳужумига учрашдан қўрқиши ана шундай номақбул тушларни кўришига сабаб бўлади. Ҳатто бу каби кураш ёпиқ ҳолда кечса ҳам шундай тушларга сабаб бўлади.

Шу туфайли, ҳаётда инсонлар билан яхши муносабатда бўлинг. Кимнингдир ёмонлигига сиз вазминлик билан жавоб беринг. Имкон қадар у инсонларни душманга айланишига йўл қўйманг. Бу каби муҳити “заҳарли” бўлган ишдан воз кечинг.

9. Номаълум маскан ёки хонага тушиб қолиш

Тушларимизда баъзан ўзимизга номаълум уйга ёки хонага тушиб қоламиз. Руҳшунослар буни қуйидагича "таржима" қилишади.

Руҳиятга кўра, тушга кирадиган ўзимизга номаълум уй ёки хона бизнинг феъл-атворимизнинг бирор ўзига хос жиҳатини англатади. Яъни, асосан янги қобилият, истеъдодини юзага чиқаришга уринаётган инсонлар тушларида мана шундай ўзларига номаълум масканларга тушиб қоладилар.

Инсон бирор истеъдодга эга бўлса ва бу истеъдодни юзага чиқаришда қийналса, ундан фойдалана олмаётганидан азият чекса, тушларида кўпинча эшиксиз хона ёки ёпиқ кўчаларга тушиб қолади.

Шунингдек, орзулари ошмай қолаётган инсонларда ҳам бундай сюжетга эга туш кўриш ҳолатлари аниқланган.

Бундай вазиятларда инсон ўз устида ишлаши, шу талантни юзага чиқариш орқали ўз руҳиятини озод қилиши керак. Шунда мия юзага чиқмаган орзуларни ўйлаб тушкунликка тушмайди ва тушида ҳам ёпиқ маскандан чиқиб кетиш учун йўллар очилади.

8. Бошқарув ёки назоаратни йўқотиб қўйиш

Тушда қоқилиб-йиқилиб юриш, машина ёки бирор нимани бошқаришда назоратни йўқотиш, ўзини бошқара олмаслик, мисол учун, бақиргиси келганида овознинг чиқмаслиги инсон ҳаётда муваффақиятга эришаолмаётганидан азобланишини англатади.

Бундай вазиятда руҳшунослар тушкунликка тушмасликни, муваффақиятни бошқа бир йўналишда синаб кўришни, орзулар сари оғишмасдан боришни тавсия қилишади.

7. Қулаш

Инсонларнинг тушида баланд нуқталардан қулаш ҳолатлари жуда кўп учрайди. Ҳаддан ташқари руҳий толиқиш, ҳаётда бирор бир мушкул вазиятга тушиб қолиш, бирор нимадан қаттиқ қўрқиш инсонни тушида баландликдан қулашига сабаб бўлади.

Бу каби хосиятсиз тушлардан халос бўлиш учун инсон ўз соғлигига эътибор бериши, ён-атрофидагиларга ишониши зарур.

6. Парвоз қилиш

Тушда инсоннинг қушдай парвоз қилиши унинг ҳаётдаги қандайдир мушкулига ечим топгани, машаққатли ишни юзи ёруғ бўлиб якунлаганини англатади.

Шунингдек, ижобий кайфиятдаги, доимо яхшиликни ният қилиб, яхши бўлишига ишонган, ўзига ишончи юқори инсонларнинг аксарияти тушида парвоз қилиши аниқланган.

5. Турли имтиҳонларга дуч келиш

Тушга қандайдир синовли жараёнларга дуч келиш, бирор танловни ҳадик билан амалга оширишга ўхшаш ҳолатлар кўп кирса, демак у инсон ҳаётда жуда кўп иккиланади. Бундай туш кўрувчилар ўзларини нуқул танқид қиладилар ва ҳаётда бирор танлов адашганликларини ҳис қилишади, имтиҳонлардан чўчишади.

Агар сизнинг уйқунгизга ҳам шундай сюжетли тушлар кўп кирса, билимингиз, дидингиз ва ўзингизга бўлган ишончни оширинг. Танладингизми, демак бунинг сабаби бор ва бундан афсусланманг. Қарорларингизни ҳадеб муҳокама қилманг.

4. Жамоат жойида кийимсиз қолиш

Кийим биринчи навбатда уят-ҳаёнинг белгиси бўлса, иккинчидан у биз ҳақимизда шаклланадиган фикрнинг бош воситасидир. Ҳаётда одамлар кўп жойда кийимсиз қолиш инсонни қаттиқ уятга қолдириб, заифлашиб қолишига сабаб бўлади.

Тушда бундай саҳналарни кўришнинг бош сабаби – дилда қандайдир муҳим сирни сақлаш экан. Яъни, бу сир бизнинг кучли одам эмаслигимизни, аслида иродасизлигимизни фош қилиб қўйишидан қўрқамиз. У сир фош бўлгудей бўлса, одамларнинг бизга нисбатан ижобий фикри ўзгариши мумкинлигини биламиз.

Инсоннинг бу каби сирлари кўпайиб бориши уни ана шундай ноқулай туш саҳналарини кўпроқ кўришига олиб келиши мумкин.

3. Ҳожатхонани топа олмаслик.

Ҳа! Шундай туш кўрадиган инсонлар ҳам кўп экан. Бу каби инсонлар ҳаётда шошқалоқ, жонсарак бўлишади. Улар ҳамма нарсага улгуришини истайдилар ва бир ишни тугатмасдан бошқасига киришиб кетадилар.

Инсон ўзининг бош эҳтиёжларини англаб етиши зарур. Ана шунда бу каби муаммоларга, хусусан тушда ҳожатхона қидириш муаммосидан халос бўлишади.

2. Тишнинг тўкилиши

Тушдаги тиш инсон руҳиятининг рамзи. Яъни, у инсонни ўзига бўлган ишончи ва ҳиссиётларини англатади.

Реал ҳаётда ўзига бўлган ишончнинг йўқлиги, руҳий изтироблар инсонни кексайтириб қўйгандек ва у бунинг таъсирини тушида кўра бошлайди. Тушда тиш тўкилиши ҳам ҳаётда ниманидир қаттиқ ўйлаш ва ундан сиқилиш сабаб юзага келади.

Бу каби ёмон тушлардан халос бўлиш учун ҳаётда хотиржам бўлишга урининг. Ҳеч нарса сабабсиз бўлмайди ва келган дард ўтиб кетади. Аммо унга сизни заифлаштиришига йўл қўйманг.

1. Кимнингдир қувлаши

Ҳаётда кўпинча ким биландир юзма-юз келишдан қўрқамиз. Бунинг сабаби кўп. Мисол учун ваъданинг устидан чиқмаслик, кимнингдир ишончини оқлай олмаслик, кимдандир қарз олиш.

Бу айниқса, қўлидан кўп иш келадиган, ҳунарли, мансаби юқори одамларда кўп учрайдиган тушлар сирасига киради.

Ҳаётда одамларга ваъда берманг, жуда бўлмаса ҳаракат қилишингизни айтинг. Имкони борича катта пул қарзга олманг. Олган бўлсангиз, тезроқ қайтариш ҳаракатини қилинг. Ишончни оқлай олмаган бўлсангиз, ўша одамга вазиятни тушунтиришдан қўрқманг. Ахир бу – қўрқинчли тушлар кўриб юришдан яхшироқ.