Ўзбекистонликлар Наврўз байрами кунларида узлуксиз 5 кун, умуман март ойида 12 кун дам олади. Qalampir.uz шу ҳақда ёзмоқда.

Ўзбекистон Республикаси Президентининг “2018 йилда расмий саналарни нишонлаш даврида қўшимча ишланмайдиган кунларни белгилаш ва дам олиш кунларини кўчириш тўғрисида”ги Фармонига мувофиқ, Ўзбекистонда беш кун – 18 мартдан 22 мартгача узлуксиз дам олиш кунлари деб эълон қилинган.

Ҳужжатга мувофиқ, 19-20 март ҳамда 22 март кунлари иш кунлари бўлса-да, байрам муносабати билан дам олиш куни этиб белгиланган. Бунда 19 март – 17 мартдан кўчирилган дам олиш куни, 20 март – қўшимча дам олиш куни, 22 март – 24 мартдан кўчирилган дам олиш куни сифатида кўрсатилган.

Умуман олганда, март ойида 8 март – Халқаро хотин-қизлар куни ҳамда бошқа дам олиш кунларини қўшиб ҳисоблаганда 12 кун дам олинади.

Эслатиб ўтамиз, Президентнинг юқоридаги Фармони билан Ўзбекистонда Янги йил байрами, Наврўз ҳамда Мустақиллик байрамларида беш кундан дам олиш белгиланди.

Узлуксиз дам олиш кунларида аҳолининг тарихий-маданий марказларга саёҳат қилиши, пансионат ва дам олиш уйларида ҳордиқ чиқариши учун меҳмонхона ва транспорт хизматларига чегирмалар тизими жорий этилади.