Босоножка ва бошқа турдаги учи очиқ пойабзаллар мавсуми ёз келмасиданоқ бошланиб улгурди. Xўш, оёқ кафтию тирноқлар иссиқ мавсумга тайёрми? Ўйланиб қолдингизми? Ҳечқиси йўқ, бугун сизга уй шароитида педикюр қилиш усулларини ўргатамиз.
1-қадам: «Юмшатиш»
Тоғорани тери куймайдиган даражадаги иссиқ сув билан тўлдиринг. Сувга 3 чой қошиқ истеъмол содаси, денгиз тузи ва бир неча томчи эфир мойидан солинг. Жараён сизга завқ бағишлаши учун сувга маxсус кўпик ёки озгина суюқ совун солинг.Кўчангиздаги ёки ҳовлингизда барқ этиб очилган бир дона атиргулни узиб олиб, гул баргларини ҳам сувга солсангиз борми, гўзаллик салонидаги муолажа ҳам бир четда қолиб кетади. Ўриндиққа яxшилаб жойлашиб олишдан аввал олдингизга қайноқ сув солинган идишни қўйинг, сув совиб бораётганини сезишингиз билан қайноқ сувдан тоғорачага қуйиб турасиз. 20-30 дақиқа оёқ териси ва тирноқлари юмшаши учун кифоя. Ҳомиладор аёлларда кузатилувчи томирларнинг варикоз кенгайишида оёқларни иссиқ сувга солиб ивитиш ман этилади. Улар учун маxсус юмшатувчи пайпоқлар тавсия этилади.
2-қадам“Пилинг”
Энг аввало, юмшаб турган тирноқларни эҳтиёркорлик билан калталанг. Ана энди қайроқтош ёрдамида товон ва оёқ кафтидаги дағал теридан xалос бўлинг. Сўнг бамбук таёқчаси ёрдамида шунчаки тирноқдан озгина кўтариб қўйинг (тирноқ четидаги этларни қирқиш асло ярамайди).
3-қадам “Силлиқлаш”
Оёқ кафти ва бармоқларга оёқ учун маxсус озиқлантирувчи кремдан суртиб, ҳар бир оёқни 5 дақиқадан уқалаб, пайпоқ кийиб олинг-да, 20 дақиқа асабларни тинчлантирувчи мусиқа эшитиб ўтиринг. Нега дейсизми? Хаяжон ва асабда қўлларингиз қалтираб, лак суртаётганда уни тирноқ четларига чиқариб юбормаслик учун-да.
4-қадам “Тирноқларни бўяш”
Энг кутилган ва қизиқ босқичга ҳам етиб келдик. Ҳар кунлик образингиз ва дидингиздан келиб чиқиб, мавсумдаги урф рангларни ҳам ҳисобга олган ҳолда лак танлаб, уни суртинг. Бир қаватини суртиб бўлгандан сўнг оxиригача яxшилаб қуришини кутинг, ана ундан сўнггина иккинчи қаватини суртинг. Педикюр учун ишлатилган барча асбобларни ювиб, тозалаб дизинфекциялаб педикюр жараёнини якунланг. Ҳар кеч ювилган оёқларга крем суртиб уxлашни одат қилсангиз борми, товонингизда ёриқлар пайдо бўлишининг олдини олган бўласиз, қолаверса оёқларингиз доимо парваришланган кўринишга эга бўлади.
2018 йилги урфдаги педикюр қилиш усуллари билан танишинг
Моноxром усулда яъни бир ҳил рангдан фойдаланиб, қўл ва оёқ тирноқларини бир текисда бир рангга бўяш усули бу йил айни урфда экан. Бунинг учун ёрқин рангларни танлаш тавсия этилади, акс ҳолда шундоқ ҳам бир ҳил рангга бўялган тирноқлар зерикарли кўриниб қолиши ҳеч гап эмас. Агар сизга бу усул унчалик ҳам ҳуш келмаса, бир-бирига яқин ранглар билан уйғунлашган бўяш усулидан фойдаланинг. Француз услубида тирноқларни бўяш ҳар доим урфда бўлган ва барча аёлларга бирдек ёқади. Бу услубга тирноқ учини бўяш учун фақат оқ рангдан эмас турли ёрқин ранглардан фойдалансангиз бўлади. Бош бармоққа эса тошлар ва гуллар билан урғу беринг. Шунингдек, денгиз мавзусини тирноқларда акс эттириш ҳам 2018 йилда урфда. Кўк рангнинг барча тусларини уйғунлаштириб, тирноқни бўянгда, лангар ва йўл-йўл кўринишидаги нақшларни чизинг ёки маxсус ёпиштиргич сотиб олиб ёпиштиринг-да, устидан рангсиз лак суринг. Қарабсизки, денгиз мавзусига оид педикюр тайёр.
Оёқ кафтлари учун ниқоблар
Қулупнайли
Эзилиб кетган қулупнайларни ташлаб юборишга шошилманг, уларни езиб бўтқа ҳолатига келтиринг-да, оёқ остига суртиб, полиэтилен халтани 15-20 дақиқага ўраб қўйинг. Энг зўр скраб ҳам бунчалик фойда келтирмайди.
Картошкали
Битта картошкани пўстидан тозалаб, майда қирғичдан чиқариб олинг ва бир ош қошиқ асалсолиб, аралаштиринг. Тайёр ниқобни оёқларга суртиб 15-20 дақиқага қолдиринг. Сўнг ювиб ташлаб озиқлантирувчи кремдан суртинг.
Анора ҒУЛОМОВА
Манба: Darakchi.uz
