Кўпчилигимиз болаликда уваланадиган хамирни гўшт қиймалагичдан чиқариб, атиргул ясаб, печене пиширганмиз. Бугун ана шу уваланадиган печене ретсептини унутганлар учун тақдим этамиз.
Зарур масаллиқлар:
- 3 та тухум
- 150 г маргарин
- 200 г шакар
- 1 чой қошиқ разрихлител
- 500 г ун
- юзига сепиш учун шакар упаси
Тайёрланиши:
Идишга хона ҳароратида юмшаган 150 г маргарин ва 200 г шакарни солиб, миксер ёрдамида аралаштирамиз.
Унга 3 та тухумни қўшиб, аралаштиришда давом этамиз.
Силлиқ масса ҳосил бўлгач, 500 г ун ва 1 чой қошиқ разрихлителни аста-секинлик билан қўшиб, қаттиққина, қўлга ёпишмайдиган хамир қорамиз.
Тайёр хамирни йирик тешикли гўшт қиймалагичдан ўтказамиз (пичоғини олиб ташлаб) ёки қўлда илончалар ясаймиз. Битта печене учун бир хил узунликдаги учта хамирча етарли бўлади.
Илончаларни аввал эшиб, сўнг атиргул кўринишида ўраймиз. Умуман, печенени ўзингиз истаган шаклда ясашингиз мумкин.
Печенеларни листга териб, 180 даражагача қиздирилган духовкада 15—20 дақиқа давомида пиширамиз.
Печенелар пишиб чиққач, юзига шакар упаси сепамиз. Гулли печене тайёр, ёқимли иштаҳа!
